◆侯宝良　　 讲起招牌嘛，大家只晓得是商店门面浪迭块牌子。诚信经商，和气生财，日脚长了，大家口口相传就会记牢搿块招牌。其实做人也是要讲究招牌嗰，假使做事体“拆烂污”，讲话没信誉，人家就会讲“搿人招牌老早坍脱了”。　　 着名滑稽演员周柏春，讲起闲话软笃笃，一副冷面滑稽面相，就是伊特有个招牌，别人想扮也扮勿像。只要伊到场，勿需要开口，就会让人发笑，真是名副其实个“笑星”。有一趟，周柏春先生去拍电影，刚做几个动作，旁边人就笑场了，导演发急，“啥人再笑，统统调人！”周大师连忙开口：“大家帮帮忙，快点摒牢，覅再笑了。”　　 周柏春先生勿但表演滑稽戏出色，还经常与人为善，搿也是姚慕双、周柏春两位先生做人个招牌。有一趟周伯春生病住辣医院里，听说有位病人呒没钞票做手术，有生命危险，伊马上借医院电话打拨正辣电台里向演出个姚慕双，拿搿桩事体一讲，姚慕双就勒电台里向听众募捐：“各位老听众，现在有位朋友差眼铜钿做手术，性命交关，请大家帮帮忙。”老听众相信伊个人品，纷纷相助，救命铜钿老快就筹集到位，病人就此得救。　　 改革开放以后，姚慕双、周柏春两位老先生多次到电台、电视台参加演出，酬金比较低，工作人员感到勿好意思，周柏春反过来安慰大家：“我伲两家头勿是为铜钿来嗰，是为了让滑稽迭门艺术能够传下去，就是一分铜钿勿拿，我伲也会来。”身旁个姚慕双也是连连点头，跷大拇指。一直到现在，讲气两位老前辈，人人侪要夸一句德艺双馨！可敬、可爱！讲到底，人生当中最好个招牌就是堂堂正正做人、踏踏实实做事体！

特别声明：以上文章内容仅代表作者本人观点，不代表新浪网观点或立场。如有关于作品内容、版权或其它问题请于作品发表后的30日内与新浪网联系。

关键字 :、电台、来自于：上海、权利保护声明页/Notice to Right Holders